Bu har bir klinikada takrorlanadigan holat. Bemor kelgan, tekshiruvdan o'tgan, davolash rejasi tayyor. Lekin summani eshitgach — "o'ylab ko'raman" deydi va ketadi.

Ko'p klinikalar bu yerda bemorni yo'qotadi. Ba'zilari esa bo'lib to'lash taklif qiladi — va boshqa turdagi muammoga duch keladi.

Bo'lib to'lashning yashirin narxi

Rassrochka o'z-o'zidan yaxshi g'oya. Muammo uni qanday hisobga olishda.

Grafik hech qayerda saqlanmaydi. "Uch oyga bo'lib to'laysiz" deb kelishildi. Bu kelishuv qayerda yozilgan? Ko'pincha — administratorning daftarida yoki umuman og'zaki.

To'lov muddati o'tganini hech kim sezmaydi. Bemor birinchi to'lovni qildi, ikkinchisini kechiktirdi, uchinchisini unutdi. Klinikada bu haqda ogohlantiruvchi hech qanday mexanizm yo'q. Uch oydan keyin kimdir eslaydi — lekin bemor allaqachon boshqa klinikaga o'tib ketgan.

Qancha pul rassrochkada ekanligi noaniq. Klinika egasi "hozir bizda qancha pul bo'lib to'lashda turibdi?" degan savolga javob bera olmaydi. Bu esa naqd pul oqimini rejalashtirishni imkonsiz qiladi.

Nizolar og'zaki bahsga aylanadi. "Men to'rt marta to'lagandim" — "Yo'q, uch marta". Yozuv bo'lmasa, kim haq ekanligini aniqlab bo'lmaydi. Va odatda klinika yon beradi.

Natijada ko'p klinikalar rassrochkadan umuman voz kechadi — va shu bilan birga eng qimmat, eng foydali xizmatlaridan (implant, ortodontiya, protezlash) mahrum bo'ladi.

Yechim: rassrochka — kelishuv emas, tizimdagi obyekt

Dental ERP da bo'lib to'lash og'zaki kelishuv emas, aniq tuzilmaga ega yozuv.

To'lov rejasi tuziladi. Umumiy summa, boshlang'ich to'lov, bo'laklar soni va muddati kiritiladi. Tizim shu asosda to'lov jadvalini avtomatik hosil qiladi: har bir bo'lakning summasi va sanasi aniq belgilanadi.

Har bir to'lov ikki joyga tushadi. Bemor bo'lak to'lovni amalga oshirganda u ham to'lov jadvalida belgilanadi, ham klinikaning umumiy to'lovlar hisobiga (kassa/tushum) tushadi. Ya'ni rassrochka alohida "parallel dunyo" emas — u umumiy moliya bilan bir tizimda.

Invoys holati avtomatik yangilanadi. To'lovlar tushgan sari invoys "qisman to'langan" holatidan "to'liq to'langan" holatiga o'zi o'tadi. Qo'lda hech narsa belgilanmaydi.

Kechikkan to'lovlar ko'rinib turadi. Muddati o'tgan bo'laklar hisobotda alohida chiqadi. Administrator kimga qo'ng'iroq qilish kerakligini o'zi qidirmaydi — tizim ko'rsatib turadi.

Bemor o'z holatini ko'radi. Bemor kartasida uning to'lov jadvali turadi: qancha to'lagan, qancha qolgan, keyingi to'lov qachon. Bahsga o'rin qolmaydi — ekranda raqam turibdi.

Bu klinikaga nima beradi

Bo'lib to'lashni tartibli yuritish — bu shunchaki qulaylik emas, bu savdo vositasi.

Bemor 12 millionni bir yo'la to'lay olmaydi. Lekin oyiga 2 million to'lay oladi. Bu ikkalasi ham bir xil pul — faqat vaqt bo'yicha taqsimlangan. Yagona farq shundaki, birinchi holatda bemor ketadi, ikkinchisida qoladi.

Klinika esa bunda hech narsa yo'qotmaydi — chunki har bir bo'lak kuzatiladi, kechikish ko'rinadi, qarz hisoblanadi.

Natija

Rassrochka endi ishonchga asoslangan tavakkal emas. U — grafigi, nazorati va hisoboti bor moliyaviy mahsulot. Va aynan shu narsa klinikaga eng qimmat xizmatlarni sotish imkonini beradi.